‘I do Dark October from a good place in my heart’ – Linda Ikeji

February 7, 2023

Popular Nigerian blogger Linda Ikeji don tok to BBC Pidgin about her first movie wey don stir up some tok-tok and controversy.

Dark October na Linda Ikeji first movie and she release am on Netflix on 3 February.

“Di movie dey dedicated to di Aluu Four victims and all di victims of jungle justice. I do di movie from a good place in my heart sake of say wen di incident happun 11 years ago e dey devastating to me to even watch di video and I carri dem in my heart for many years. Unfortunately, jungle justice na still problem for dis kontri. Last year, dem set one guy on fire for Lekki while pipo dey watch and nobodi stop am. For me, I no focus on di negative comments about di movie.”

While di movie get some positive reviews from Nigerians on social media, e also cause tok among some pipo wey accuse Ikeji say she no seek di consent of di families of di victims wey di movie revolve around.