Former Manchester City player, Benjamin Mendy, don win im legal battle against di club to recover di unpaid salary wey dem hold back during im trial for rape charges. Mendy, wey dem clear of all charges, argue say di deductions from im salary no get authorisation, and di employment tribunal rule in im favour.
Di matter na about City decision to stop Mendy’s £500,000-a-month salary for 2021 after dem arrest am di second time. Mendy bin dey receive full pay after dem first arrest am for November 2020, but after di second arrest, City tell am say dem no go pay am again as e “not presently ready and able to perform the obligations of his contract.”
For di tribunal, dem reveal say Mendy bin first claim about £11 million before tax for di 22-month period. Di tribunal rule say Mendy fit collect most of di money, but di exact amount still dey under negotiation. If dem no reach agreement, dem go arrange another hearing to settle di final figure.
During di case, Mendy tell court say former teammates like Raheem Sterling, Bernardo Silva, and Riyad Mahrez help am financially while im salary no dey come, and im even sell im Cheshire mansion to cover legal fees, bills, and child support.
Manchester City argue say na Mendy irresponsible behaviour cause di issue, as dem talk say e hold parties for mansion during lockdown and breach im bail conditions. Di club’s legal representative, Sean Jones KC, add say, “The essence of the submission by Mr Mendy is that his contract creates a moral hazard. He says, ‘I can behave as irresponsibly as I like… there should be no consequences to my behaviour.’”
Afta di court clear am last year, Mendy express relief, shout “Alhamdulillah,” wey mean “Praise be to God.” Im lawyer, Jenny Wiltshire, talk say, “This is the second time that Mr Mendy has been tried and found not guilty by a jury. He is delighted that both juries reached the correct verdicts.” She add say di three-year investigation don affect Mendy seriously.
Mendy don go back to France to rebuild im career and now dey play for Lorient for France Ligue 2.
